|
 |
Вести / Македонија
|
|
Антикорупциската комисија генерално задоволна од спроведувањето на Државната програма за спречување на корупцијата
Охрид, 4 јули (МИА) - Реализацијата на краткорочните активности на Антикорупциската комисија од спроведувањето на државната програма за спречување на корупцијата генерално може да се оцени како задоволувачка, беше истакнато на првата Годишна конференција Комисијата што денеска и утре се одржува во Охрид.
Како што истакна претседателот на Државната комисија за спречување на корупцијата Мирјана Димовска, од 98-те активности посочени во програмата, реализирани се 31, 27 се делумно реализирани, 26 се нереализирани, а за 14 краткорочни активности Комисијата нема податоци.
Во делот на заклучоците што се однесуваат на политичкиот систем, Собранието и политичките партии, на конференцијата е истакнато дека активностите задоволуваат со забелешка на бавното темпо во делот што треба да ги спроведат надлежните институции.
- Има случаи на спроведување на измени на закони, но не во онаа смисла како што е посочено во програмата на Антикорупциската комисија. Постојат случаи да се менуваат закони, но да не се оствари суштината на законодавниот акт, истакна Димовска.
Во делот што се однесува на економско-финансискиот систем, Димовска посочи дека активностите од нормативниот карактер се одвиваат со задоволително темпо, притоа посочувајќи ги како коректни измените во законите за царините и за јавните набавки, како и другите закони од таа област. Слична е состојбата и во делот од активностите на Комисијата кои се однесуваат на јавната администрација и локалната самоуправа каде реализацијата на краткорочните активности е на задоволително ниво, но изостануваат активностите од нормативен и суштински карактер што имаат влијание врз реализацијата на другите задачи.
Како најпроблематичен се посочува делот на активностите што се однесуваат на граѓанското општество, медиумите и синдикатите каде изостанува реализацијата на активностите, а се посочени сериозни проблеми во доставувањето информации.
- Заклучок е дека соработката во рамките на реализацијата на Државната програма за спречување на корупцијата со речиси 200 институции на Република Македонија вклучени во процесот сосема добро се одвива со некои помали забелешки од оперативен карактер, додаде Димовска.
Државниот секретар при Министерството за правда Нуман Лимани ги поздрави активностите што ги презема ДКСК во насока на спречување на коруптивните процеси.
- Интерес на Владата на Република Македонија е Антикорупциската комисија да си ја врши својата работа и целосно ја поддржува преку усвоената Програма за борба против организираниот криминал и корупцијата, формирањето меѓуресорско тело за следење на активностите во борбата против корупцијата во која свој претставник имаат сите државни институции со цел да се одржува координираност меѓу Комисијата и владините тела. Имаме точни податоци, знаеме што работиме, истакна Лимани.
Во рамките на дводневната конференција претставници на сродни институции од Албанија, Косово, Србија, Црна Гора, Хрватска, Словенија, како и од европските асоцијации, утре на посебна сесија ќе расправаат за некои области од заеднички интерес, за националните практики во одделните земји, за меѓународните стандарди, а ќе ќе се разгледуваат и можностите за унапредување на билатералната односно регионалната соработка.
На утрешната сесија ќе биде потпишан меморандум за соработка меѓу Државната комисија за спречување на корупцијата на Македонија и Антикорупциското биро на Црна Гора, сличен на веќе потпишаниот договор со црногорската Комисија за спречување на судир на интереси.
|
|
|
|
|
|
 |
Пребарување
|
|
|
|
|
|
|
IDIVIDI Речник
|
|
|
|
| Powered by MagnumPRO |
|
|
|