Скопје, 11 јули (МИА) - Претседателот на Владата на Република Македонија, Никола Груевски, денеска оствари средба со делегација од земјата на Хунзите, предводена од принцот Мир Газанфар Али Кан и принцезата Рани Атика.
Премиерот Груевски им посака добредојде на гостите и го поздрави воспоставувањето на врските помеѓу двата народи, а воедно го истакна интересот и подготвеноста на Македонија за натамошно динамизирање на односите и унапредување на соработката на секое поле од заемен интерес.
Како што соопшти Кабинетот на претседателот на Владата, принцот Мир Газанфар Али Кан посочи дека му е чест што се наоѓа во својата земја, Македонија, и кај својот народ со кои имаат историска поврзаност. Принцот потенцира дека тие се горди што се наследници на Александар Македонски, а информираше за земјата и народот на Хунзите.
Соговорниците нагласија дека во иднина ќе се интензивираат контактите и изразија подготвеност за конкретна соработка и проекти во иднина, како што се заемни посети и размени во сферата на културата, науката, историјата, образованието, фолклорот и лингвистиката кои што ќе придонесат во натамошното продлабочување на односите помеѓу двата народи.
Премиерот Груевски ги информираше гостите за состојбите во Република Македонија во однос на нејзиниот политички, економски и културен развој, како и процесите на интеграција на Македонија во европските и евро-атлантските организации.