|
 |
Вести / Македонија
Хидроцентралата „Матка“ виновна за поморот на риба во Вардар кај Велес
 Скопје, 25 јули (МИА) - Наглото испуштање преголема количина вода од хидроцентралата „Матка“ го предизвика поморот на риба во реката Вардар кај Велес, потврди директорот на Државниот земјоделски инспекторат Ванчо Димитриев.
Повикувајќи се на резултатите од анализите спроведени во лабораториите на Ветеринарниот факултет и Министерството за животна средина и просторно планирање, Димитриев рече дека рибите угинале поради недостиг на кислород, а не од болест или од какво било труење.
- На 22 јули во 16 часот нивото на реката Вардар, според УХМР, било 52 сантиметри, а за еден час подоцна достигнало еден метар и 30 сантиметри што покажува дека наеднаш била испуштена преголема количина вода, истакна Димитриев.
Според него, лабораториските анализи на водата покажале зголемена концентрација на тиња, додека испитувањата на рибите извесни количини талог, песок и црвенило околу шкргите.
Државниот земјоделски инспекторат ќе поднесе прекршочна пријава до ХЕЦ „Матка“ која, во случајов, согласно Законот за рибарство и аква култура, ќе биде должна да ја надомести штетата со порибување.
Во поморот што се случи пред три дена се претпоставува дека угинале околу 10 тони риба.
Согласно новиот Закон за рибарство и аквакултура казните за правни лица кои предизвикале помор на риба изнесуваат од 3.000 до 5.000 евра, а за физички лица од 2.500 до 5.000 евра. Предвидени се и прекршочни санкции за забрана на вршење на дејноста од една до пет години. Оној што ја предизвикал штетата мора да ја надомести со порибување.
|
|
|
|
|
|
 |
Пребарување
|
|
|
|
|
|
|
IDIVIDI Речник
|
|
|
|
| Powered by MagnumPRO |
|
|
|