Скопје, 31 јули (МИА) - Сите 62 пратеника присутни во Собранието ја усвоија, по итна постапка, Одлуката за подигање Меморијален споменик на Тоше Проески во Крушево.
Министерката за култура Елизабета Канческа-Милевска образложи дека одлуката е итна зашто се работи за личност која придонесе за широка афирмација на македонската музика надвор од границите на Македонија, кон која во сите јавни настапи ја изразуваше својата љуов, како и поради неговата хуманост за што од 2004 година беше амбасадор на УНИЦЕФ.
Иницијативата за подигање Меморијален споменик, Собранието ја прифати на седница во март годинава и ја задолжи Владата да подготви предлог-одлука за подигање на споменикот. Во неа се содржани сите битни елементи во согласност со Законот за меморијални споменици - одговорно лице за подигање, правно лице што ќе се грижи за негово чување, извори на средства, видот и содржината на споменикот итн.
- Неговите дела се пример и порака за сите генерации. Со подигање на Меморијалниот споменик на достоинствен начин ќе го одбележиме споменот за Тоше и неговиот лик и дело, рече, меѓу другото, министерката за култура.
Владата постхумно го прогласи Тоше Проески за почесен граѓанин на Република Македонија, по неговото загинување во сообраќајна несреќа на 16 октомври 2007 година кај Нова Градишка, Хрватска. Проески беше роден на 25 јануари 1981 година во Крушево, каде што е и погребан.