|
 |
Вести / Македонија
|
|
Уапсени двајца прилепчани осомничени за тешки кражби во Скопје
Скопје, 27 август (МИА) - Припадници на посебната единица „Алфа“ при Секторот за внатрешни работи во Скопје ги уапсија лицата К.Д.(23) и П.Љ.(23), двајцата од Прилеп, вчера непосредно по извршување на тешка кражба во обид, во стан.
Министерството за внатрешни работи денеска соопшти дека во работата со нив целосно се расветлени и документирани две кривични дела „тешки кражби“ во станови, како и споменатата „тешка кражба во обид“ во стан.
Тешките кражби, се појаснува во соопштението, се извршени на подрачјето на полициските станици „Карпош“ и „Ѓорче Петров“, во тековниот месец, а во фаза е и расчистување на други кривични дела од овој вид, извршени и на други подрачја од градот. Со двете извршени кривични дела, сторителите се стекнале со противправна имотна корист од 354 000 денари, а делата ги вршеле заедно со уште едно лице, чиј идентитет сеуште не е познат. Делата биле извршени преку ден, во временскиот период од 10 до 14 часот, со кршење на цилиндерот од бравата од влезната врата на становите, со алат - француски клуч кој по извршувањето го фрлале. Од становите краделе златен накит, пари и девизи и истите ги трошеле за свои потреби.
Од извршените разговори со двајцата е утврдено дека по предходен договор, со возила марка „Форд“ и „Ауди А-6„ доаѓале од Прилеп и по извршувањето на кривичните дела се враќале назад.
МВР подвлекува дека на 18.08.2008 година на ул. „Стефан Филиповиќ“ бр. 4 во населбата Хром, во времето од 12:30 до 14 часот извршиле тешка кражба во станот, сопственост на Т.Р., при што украле 2.150 евра, 40.000 денари и златен накит, со што се стекнале со противправна имотна корист од 220 000 денари. Наредниот ден во периодот од 10:30 до 11:20 часот, на ул. „Иво Рибар Лола“ бр. 147 во станот сопственост на О.С. украле разновиден златен накит, 500 американски долари, 300 евра, 3.000 денари и друго, со вкупна материјална штета од околу 134.000 денари.
На 26.08.2008, околу 11:30 часот, осомничените дошле на ул.„Московска“ бр. 9 и насилно влегле во станот сопственост на А.К., меѓутоа бидејќи биле забележани од сопственичката, се дале во бегство со такси возило кое случајно наишло. По пријавувањето од страна на сопственичката и брзото интервенирање на мобилната единица и полициската станица „Карпош“, пријавените се лишени од слобода и приведени.
Третото непознато лице сеуште е во бегство. Двајцата во текот на денешниот ден, заедно со Кривична пријава за сторените дела, ќе бидат предадени на Основното јавно обвинителство - Скопје, а продолжува да се работи на споредување на нивните папиларни линии со отпечатоците земени од повеќе станови на подрачјето на Скопје каде што изминатиов период беа пријавени тешки кражби. Инаку, К.Д. е познат на службата како повеќекратен сторител на кривични дела од имотен карактер, за кои има и издржувано казна затвор.
|
|
|
|
|
|
 |
Пребарување
|
|
|
|
|
|
|
IDIVIDI Речник
|
|
|
|
| Powered by MagnumPRO |
|
|
|