|
 |
Вести / Македонија
|
|
Промовирана еколошката телефонска линија за пријавување штети во животната средина
Скопје, 5 септември (МИА) - Друштвото на екологистите на Македонија (ДЕМ) во партнерство со Космофон денеска ја промовираа новата „Зелена линија“ која ќе им овозможи на граѓаните да ги пријавуваат сите појави штетни за животната средина и населението.
Телефонската линија ќе функционира како бесплатен сервис на граѓаните, а еколошките штети ќе може да ги пријавуваат сите корисници на фиксната и мобилнаta телефонија на Космофон во пет региони низ Република Македонија на броевите со префикс 075 142 521 за Скопје, 142 522 за Валандово, 142 523 за Македонска Каменица, 142 524 за Македонски Брод и 142 525 за Охрид.
Активистите кои ќе ги примаат повиците од граѓаните ќе бидат сместени во организациите на еколошките друштва „Калинка“ од Валандово, „Здравец“ од Македонска Каменица, „Треска“ од Македонски Брод и „Грашница“ од Охрид.
- Целта на оваа линија е подигнување на свеста и вклучување на граѓаните за подобра заштита на животната средина и навремена реакција и решавање на настанатите проблеми. „Зелениот телефон“ е наменет за сите граѓани преку кој ќе добиваат и совети како да се грижат за околината. Се надеваме на голема масивност и пријавување на прекршителите, рече на денешната прес - конференција Руска Мицева, потпретседател на ДЕМ.
Директорката на Одделот за односи со јавност во Космофон Емилија Трајковиќ - Христова рече дека очекува придонесот од компанијата да биде поттик за развивање на еколошката свест во човековата околина.
- Ова е една од повеќето наши активности и се надевам дека во иднина ќе има уште и сите ќе го дадеме својот придонес за да ја заштитиме животната средина, додаде Трајковиќ - Христова.
Проектот е поддржан и од Американската амбасада, Министерството за животна средина и просторно планирање на Република Македонија.
|
|
|
|
|
|
 |
Пребарување
|
|
|
|
|
|
|
IDIVIDI Речник
|
|
|
|
| Powered by MagnumPRO |
|
|
|