|
 |
Вести / Македонија
|
|
Потпишан Меморандум за соработка меѓу СКМ и ЦУК
Скопје, 5 септември (МИА) - Претседателот на Стопанската комора на Македонија (СКМ) Бранко Азески и директорот на Центарот за управување со кризи (ЦУК) Панде Лазаревски денеска потпишаа Меморандум за соработка меѓу двете институции.
Меморандумот, како што истакна Азески, ќе им овозможи на компаниите членки на СКМ да бидат во функција на сопствена, но и општествена заштита од штети предизвикани во кризните состојби. Со него Комората ги става сите свои капацитети во функција на справување со евентуални кризи.
- Ризикот е можност за загуба. Управувањето со ризик е насочување и контрола на можноста за загуба. Покрај цивилното население, кризните состојби се ризик и за бизнисите, без оглед на нивната природа. Збирот на индивидуалните загуби се рефлектира врз општеството во целина. Затоа бизнисот има право и обврска да учествува во управувањето со кризи, односно да биде одговорен за сопствениот развој, рече Азески по потпишувањето на Меморандумот.
Тој посочи дека Меморандумот претставува премостување на недостатокот во Законот за управување со кризи и ќе овозможи и фирмите како активни субјекти да се вклучат во менаџирањето на кризите.
Директорот на ЦУК Лазаревски рече дека е многу важно и бизнис заедницата да биде пример и да го пружи својот дел во превенцијата и справувањето со кризните ситуации.
- Мораме и треба да бидеме подготвени да се справуваме со несреќите кои произлегуваат од стихијата и природата. Заради тоа значајно место во подготовките треба да имаат и НВО и бизнис заедницата која располага со капитал, човечки ресурси, материјално технички средства, а поседува и организација со која дава пример на каков начин луѓето се справуваат во конкретни ситуации, изнудувајќи го максимумот што може да се извлече во дадена ситуација, рече Лазаревски, нагласувајќи дека бизнис заедницата е пример за сите на каков начин може да се извлече максимумот при дадените ограничувања.
Тој истакна дека Меморандумот понатаму ќе биде проследен и со потпишување други договори со Комората и нејзините членки.
|
|
|
|
|
|
 |
Пребарување
|
|
|
|
|
|
|
IDIVIDI Речник
|
|
|
|
| Powered by MagnumPRO |
|
|
|