Кичево, 17 септември (МИА) - Министерството за култура интензивно работи на проектот за изградба на спомен - куќата на Тоше Проески, изјави министерката за култура Елизабета Канческа - Милеска во Кичево при денешната посета на институциите од областа на културата во тој град.
- Избрано е идејно решение, авторите се во завршна фаза на изработка на проектите, објавен е тендер за градба и избрани се неколку фирми кои влегуваат во втората фаза. Сега сме во фаза на решавање на имотно - правните работи околу местото каде ќе се гради Спомен - куќата. Јас се надевам дека тоа бргу ќе се реши и дека до крајот на годината ќе може да се постави камен темелникот, рече Канческа - Милеска.
Одговарајќи на новинарско прашање околу фазата во која е изградбата на Спомен - куќата на Тоше, таа додаде дека тоа е во согласност и со динамиката направена од страна на Министерството за култура.