Охрид, 9 септември (МИА) – Специјализирана фирма, со искуство во извлекување потонати бродови и пловни објекти, ќе биде ангажирана за извлекување на „Илинден“ од водите на Охридското езеро.
Таквата одлука Комисијата за утврдување на причините за потонувањето на бродот „Илинден“ ја донела откако некои од членовите инсистирале професионална фирма да го спроведува вадењето на потонатиот борд, поради стравувања дека нестручно извлекување би можело да доведе до оштетувања кои можат да ја попречат истрагата.
Капетанијата во Охрид и Комисијата засега официјално не соопштуваат никакви детали за текот на истрагата, но нивни претставници потврдуваат дека за извлекувањето на потонатиот „Илинден“ се пријавиле три фирми – од Хрватска, од Србија и од Швајцарија.
Според процедурата, понудите на изведувачот на работите одат кај истражниот судија, кој и наложи извлекување на „Илинден“. Изборот на најдобрата понуда е на истражниот судија, но по препорака на Комисијата која ќе се изјасни откако ќе ги разгледа добиените понуди.