Скопје, 21 септември (МИА) - Како претставник и одговорен на министрите Албанци во Владата, не само што ја осудувам содржината на Македонската енциклопедија издадена од МАНУ, туку и се оградувам од неа. Сметам дека секоја институција во Македонија треба да биде внимателна кон издавање текстови кои влијаат врз меѓуетничките односи во земјата, односите кон соседите и врз уривањето на имиџот на Македонија во очите на меѓународниот фактор, изјави денеска вицепремиерот задолжен за имплементација на Охридскиот договор Абдулаќим Адеми при инаугурацијата на новата амбуланта во село Копаница, општина Сарај.
Адеми кој во Енциклопедијата препознава „тенденции за нарушување на меѓуетничките односи“, смета дека „таквите текстови влијаат и врз односите со САД и Велика Британија, земји кои се големи поддржувачи на Македонија во евроатланските процеси“.
- Овој текст е сосема погрешен, треба да се повлече од употреба и да ги земе предвид сите историски и научни аспекти, како и балканските реалности. Ние, не само што се оградуваме, туку и ја осудуваме неговата содржина, рече Адеми и најави дека ДУИ како политички субјект ќе ги обвини авторите, но и МАНУ како институција.
- Вакви навредувачки текстови за албанскиот народ и за јавни личности во Македонија ги ризикуваат меѓуетничките односи не само меѓу Албанците, туку ги загрозуваат и односите меѓу Македонија, Албанија и Косово, истакна вицепремиерот.
Тој оцени дека со Македонската енциклопедија Охридскиот договор не е доведен во прашање зашто освен од домашните политички субјекти, има и меѓународна поддршка.