Њујорк, 22 септември (МИА) – Шефот на македонската држава Ѓорге Иванов од денеска до 26 септември во Њујорк ќе учествува 64. Генерално собрание на ОН.
Иванов, како што јави известувачот на МИА, ќе присуствува и на повеќе други форуми на Светската организација, а ќе има и серија билатерални средби. Контактите со многубројните странски државници, меѓународни претставници и дипломати, ги почнува со средбите со генералниот секретар на НАТО Андерс Фог Расмусен и со холандскиот премиер Јан Петер Балкененде.
Македонскиот претседател денеска ќе учествува на Самитот за климатски промени, а на покана од поранешниот американски претседател Бил Клинтон, ќе присуствува и на петиот годишен состанок на Клинтон глобалната иницијатива.
Централен настан од агендата на Иванов е обраќањето што ќе го има пред Генералното собрание на 25 септември.
Посетата на Њујорк ќе биде искористена и за консултации со посредникот во грчко-македонските разговори за името Метју Нимиц. Шефот на државата со медијаторот се состанува на 24 септември, а три дена подоцна со Нимиц треба да се сретне и шефицата на дипломатијата на Грција Дора Бакојани, но нејзиното доаѓање во САД е неизвесно поради здравствени проблеми. Не е исклучено средба со посредникот на ОН да има и лидерот на најголемата грчка опозициска партија ПАСОК Јоргос Папандреу, кој ќе престојува во Њујорк како гостин на Клинтон глобалната иницијатива. Засега нема најави за евентуални директни контакти меѓу македонски и грчки претставници.
Името ќе биде една од темите и на средбите на претседателот Иванов со генералните секретари на ОН Бан Ки-мун и на НАТО Андерс Фог Расмусен.
На 64. Генерално собрание, чија главна дебата ќе се одвива во два термина од 23 до 26 и од 28 до 30 септември, ќе присуствуваат шефови на држави и влади, како и министри за надворешни работи на 192 земји членки на ОН. Главни ѕвезди годинава се американскиот претседател Барак Обама, кому ова ќе му биде прво обраќање пред Генералното собрание, како и претседателите на Иран Махмуд Ахмединеџад, на Либија Моамер Ел Гадафи и на Венецуела Хуго Чавез. Покрај политичари, на накои од форумите што се одржуваат во рамки на собирот, ќе учествуваат и познати личности од филмскиот и музичкиот шоу бизнис ангажирани во хуманитарни проекти, како Мет Дејмон, Деми Мур, Барбара Стрејсенд, Квинси Џонс и Алиша Кис.
Централни теми на годинашното Генерално собрание на ОН се климатските промени, одржливиот економски развој, борбата против тероризмот и организираниот криминал, одржувањето на меѓународниот мир и безбедност. Ќе се разговара и за развојот на Африка, за унапредувањето на човековите права и за подобра координација на хуманитарната помош.