Скопје, 23 септември (МИА) - Членовите на главната редакција на „Македонската енциклопедија“ денеска во проширен состав на состанок во МАНУ одлучија да коригираат некои одредници во публикацијата и да продолжат да работат на второ, изменето и дополнето издание.
Лексикографскиот центар на Македонската академија на науките и уметностите соопшти дека заклучокот од денешната седница следува по реакцијата на политичките партии, здруженија и поединци во врска со објавената енциклопедија.
- Беше заклучено да се информира јавноста дека ќе бидат направени извесни поправки во некои одредници и ќе продолжи работата врз второ, изменето и дополнето издание, се наведува во соопштението на Лексикографскиот центар на МАНУ.
Првата национална енциклопедија беше промовирана минатата среда, објавена со финансиска поддршка на Владата, по неколкугодишна работа на Лексикографскиот центар и на околу 260 соработници под водство на главниот редактор - академик Блаже Ристовски.
Излегувањето од печат на двотомното издание предизвика реакции кај албанските партии во Македонија, кои не согласувајќи се со некои одредници побараа негово повлекување. Тиражот на Енциклопедијата е 2.000 примероци.