Њујорк, 23 септември (МИА) - Недоразбирањата што настанаа по објавувањето на енциклопедијата на МАНУ ќе бидат амортизирани и надминати, оценија македонскиот претседател Ѓорге Иванов и албанскиот премиер Сали Бериша на денешната средба во Њујорк, јави известувачот на МИА.
Иванов истакна дека од политичка позиција не е коректно да се коментираат научни трудови. МАНУ е независна институција врз која претседателот на државата нема влијание. Шефот на македонската држава посочи дека негов приоритет и натаму останува мултиетничката и верската сплотеност во Македонија.
Заедничка оценка е дека продолжува добрата соработка меѓу двете земји. Акцент треба да се стави на економијата и на реализација на меѓусебното инфраструктурно поврзување. Бериша информира дека од албанска страна активно се работи на изградба на железницата и на патиштата кои водат до Македонија.
Во контекст на НАТО и ЕУ интеграцијата, македонскиот претседател уште еднаш го поздрави зачленувањето на Албанија во Северноатлантската алијанса. Од друга страна, Македонија, која е понапред во процесот на евроинтергација, и нуди на Албанија техничка и друг вид помош во приближувањето кон ЕУ, особено за визната либерализација.
Претседателот Ѓорге Иванов на маргините од 64. Генерално собрание во Њујорк, денеска се сретна и со претседателот на Летонија Валдас Затлерс.