Атина, 7 октомври (МИА) - Претстојните случувања во врска надворешно-политичките прашања важни за Грција како што се спорот за името, кипарското и несогласувањето со Турција, се главните причини што го принудија Јоргос Папандреу покрај премиерската да ја преземе и должноста министер за надворешни работи, пишува денеска „Та неа“.
Целта на Папандреу, наведува весникот, е да го обели образот на Грција на меѓународен план и земјата веќе да не биде гледана како „црна овца“ во Европа. Во тоа ќе му помага вицепремиерот и поранешен шеф на дипломатијата Теодорос Пангалос со своите широки меѓународни контакти. Прва задача на Папандреу и новата Влада на надворешно политички план ќе биде Самитот на ЕУ во декември кога ќе се расправа за перспективите на Турција за членство во Унијата, посочува „Та Неа“.
Се очекува Папандреу да го услови приклучувањето на Турција со отстапки на Анкара во врска со Кипар и територијалните несогласувања во Егејското Море. „Та Неа“ не коментира каква ќе биде позицијата на новата власт во Атина во однос на очекувањата на Македонија да добие датум за почеток на преговорите со ЕУ, како и визна либерализација од почетокот на 2010 година.