Скопје, 7 октомври (МИА) - МВР има првични сознанија во врска со пожарот во манастирот „Св. Јован Бигорски“, истрагата е во тек и затоа не би шпекулирале ниту со причините за пожарот, ниту со други дополнителни квалификации се до конечното завршување на истрагата односно комплетирање на доказите од увидот и вештачењата кои се прават, информира министерката за внатрешни работи, Гордана Јанкулоска, на прес- конференцијата денеска по повод заплената на 27 килограми хероин.
- Без разлика на повеќето шпекулации кои се појавија во јавноста, вистината е дека се работи за исклучително обемна и сложена истрага, која за да биде квалитетно и комплетно завршена потребно е да се одвои повеќе време, рече Јанкулоска, одговарајќи на новинарско прашање до каде е истрагата за пожарот во „Св. Јован Бигорски“, кој предизвика штета од 5,5 милиони евра, а при тоа трајно се уништени и објекти и предмети чија историска и културна вредност е ненадоместлива.