Скопје, 8 октомври (МИА) - Гевгеличанката со бугарски пасош Спаска Митрева изутрината е ослободена од затворот „Идризово“ во Скопје, дваесеттина дена пред истекот на тримесечната затворска казна што и беше одредена поради непочитување судска одлука да му дозволи на својот поранешен сопруг да ја посетува нивната двегодишна ќерка.
Митрева е ослободена со одлука директорот на затворот Миле Младеновски, кој има право на тоа согласно член 206 од Законот за извршување санкции. Taa требаше да остане в затвор до 29 октомври оваа година.
- Одлуката е донесена по овластување врз основ на членот 206 од Законот и директорот може да донесе одлука за предвремено отпуштање од затворот. Тука е искористена таа можност и таа е ослободена, изјави за МИА, директорот на „Идризово“ Миле Младеновски, кој додаде дека Митрева била една од најпримерните во затворот.
Претходно, информацијата за предвременото пуштање од затвор на гевгеличанката ја потврди и директорот на Управата за извршување санкции, Лидија Гавриловска.
Митрева во моментот се наоѓа во зградата на бугарската Амбасада во Скопје, каде според изјавите на Ангел Ангелов в.д. амбасадор за бугарски медиуми, се очекува таа да разговара со адвокати.
Случајот со гевгеличанката која пред неколку месеци добила бугарски пасош, предизвика дипломатски несогласувања меѓу Македонија и Бугарија, по обвинувањата од Софија дека била санкционирана само затоа што била Бугарка.