Скопје, 14 јануари (МИА) - Владата на Република Македонија не размислува за промени на Законот за заштита од пушење и покрај најавените протести на угостителите за 22-ри овој месец со затворање на нивните локали, рече вицепремиерот Владимир Пешевски на денешната прес-конференција во Владата, одговарајќи на новинарско прашање.
Тој појасни дека Македонија не е првата, ниту, пак, ќе биде последната земја која се одлучи за целосно спроведување на забраната за пушење на јавни места и додаде дека економските анализи укажуваат оти има позитивни ефекти од нејзиното воведување.
- Долгорочните ефекти на економијата од ваквите мерки се секогаш позитивни иако краткорочно е можно намалување на профитот во угостителските објекти, истакна вицепремиерот Пешевски.
Прашан дали Владата планира да направи промени во Стратегијата за привлекување странски инвестиции, вицепремиерот задолжен за економски прашања рече дека промени во континуитет се прават само во пристапот кон привлекување инвестиции.
- Нема промени во Стратегијата, туку во пристапот кон привлекување странски инвестиции. Такви промени и досега во континуитет се правеле, а ќе продолжиме да ги правиме и во иднина, посочи вицепремиерот Пешевски.