Атина, 11 февруари (МИА) - Посредникот на ОН во македонско-грчките разговори за името Метју Нимиц на 23 и 24 февруари ќе го посети Скопје, а на 26 Атина, потврди денеска портпаролот на Светската организација Ванина Маестрачи.
Нимиц доаѓа во Македонија и во Грција на покана од владите на двете земји, стои во кусото соопштение од прес-службата на ОН.
Пред официјалната потврда на термините, портпаролот на Министерството за надворешни работи на Грција Григорис Делавекурас денеска на средба со новинарите најави дека медијаторот се очекува во Атина во последната седмица од месецов.
Делавекурас рече дека Грција сака прашањето за името да се реши што побрзо и оти очекува „креативен пристап и од другата страна“. Според него, решение за спорот за името е можно, но, како што посочи, “тоа првенствено зависи од политичката волја на Скопје“.
- Обострано прифатливо решение би и ги отворило евроатлантските перспективи на поранешната југословенска Република Македонија, изјави Делавекурас.