Регионалниот магистрален патен правец Маврово - Дебар, во близина на манастирот Св. Јован Бигорски повторно е блокиран, поради две лавини од снег и одрони од земја.
Едната е регистрирана на половина километар од бензинската пумпа, во близина на месноста Коцево Анче, а другата на двесте метри во правец кон Дебар. Првиот одрон се урнал на коловозот околу 14 часот.
Во телефонскиот разговор со лицата кои се уште работат на теренот на расчистување на одронот, кој минатата недела го блокира сообраќајот во долината на Радика, нема информации дали под големиот нанос има настрадани. Од очевидци, пак, има информации дека едно возило било зафатено од наносот од снег.
Во моментов екипите за расчистување се упатиле кон новите одрони за да ја утврдат состојбата и да интервенираат.
Од АМСМ потврдија дека поради новото лизгање на земјиштето, сообраќајот за сите видови на возила е повторно затворен на овој патен правец, а екипи на Македонија пат интензивно работат на расчистување на патниот правец.
Голем одрон, земја, снег и дрва долг 500 метри, а висок седум метри, минатиот четврток се урна на патот Маврово - Дебар, во близина на Св. Јован Бигорски.