Скопје, 18 март (МИА) - Премиерот Никола Груевски ја одбива поканата на лидерот на СДСМ Бранко Црвенковски за телевизиски дуел. Вели дека нема потреба од соочување зашто тој како политичар одговара пред граѓаните и со нив секојдневно комуницира.
- Јас како политичар одговарам пред граѓаните и оние кои ме избрале, а не пред Бранко Црвенковски, тој да ми раскажува за ’95, за ’96 година. Да се расправаме, не. Јас секој ден сум присутен пред граѓаните на Република Македонија, преку медиумите, преку трибини, преку директни посети на населени места, изјави Груевски по промоцијата на новите наслови од проектот за превод на 500 стручни книги.
Претседателот на Владата не го коментира предлогот на ДУИ за отворени изборни листи, односно наместо гласање за партиска листа, да се гласа одделно за кандидати.
Во врска со разговорите за името, тој рече дека наскоро од медијаторот Метју Нимиц очекува нова идеја.
Груевски најави дека наскоро ќе има и повторна лидерска средба за измените на Уставот.