Скопје, 7 април (МИА) - Лидерите на најголемите парламентарни политички партии утре во 12 часот во Клубот на пратениците ќе имаат нова средба на која ќе се договараат за измените на Уставот на Република Македонија, во делот на Судскиот совет.
Како што соопшти денеска владиниот Сектор за односи со јавност, темата за која ќе се дискутира е иницијативата за измени на Уставот во делот за избор на членови на Судскиот совет, со кои би се зајакнала независноста на судскиот систем на Република Македонија и би се зголемила неговата ефикасност
Од ВМРО-ДПМНЕ информираа дека материјалите со предлог уставните измени во писмена форма веќе им се доставени на партиските челници, како што беше договорено на последната лидерска средба на 11 март оваа година.
Предлогот, како што образложи премиерот Никола Груевски, содржи неколку клучни работи - да се зголеми бројот на членови на Судскиот совет избрани од редот на судиите со непосредно тајно гласање на сметка на оние што ги предлагаат Собранието и претседателот на државата, министерот за правда да не е член на Советот и скратување на мандатот на членовите кој сега е шест години.