Скопје, 4 мај 2010 (МИА) - Помошник-генералниот директор на „Макстил“ Нове Георгиевски потврди дека утрово околу осум часот во делот „Челичарница“ се случила експлозија на тело кое имало експлозивно полнење при што е тешко повреден работникот Димо Пигуловиќ.
- Се случила експлозија, некое тело одлетало од местото на настанот и паднало некаде на два до три километри, кај капија „Север“. Најверојатно се работи за направа експлозивно тело кое имало експлозивно полнење, изјави Георгиевски, додавајќи дека во близина на експлозијата имало и други работници кои му помогнале на повредениот.
Тој појасни дека се што доаѓа до погоните прво треба да има сертификат за нерадиоактивност (возилото што влегува во кругот), но заради сигурно подлежно е на повторна контрола и ако се утврди дека освен старо железо има, посочи, и гранати, се стопира и се враќа на местото од каде доаѓа. Во Железара, според него, најопасно е во печка да влезе резервоар со вода, но и боца ако не е пресечена на пола, од технички гасови пропан бутан, граната. Двапати пристигнале гранати од Србија, кои биле вратени назад.
На новинарско прашање дали во овој слулчај можно е да е направен пропуст, Георгиевски нагласи дека доколку се работи за некое тело што навистина не укажува на тоа дека е експлозивна направа, тие, како што рече,неможат да утврдат.
Претходно, Томче Божиновски, инспектор од Дирекција за заштита и спасување, информира дека не станува збор за паднат авион или беспилотно летало, туку за експлозија во погонот „Челичарница“ во Железара, што ги вознемири жителите на Скопје.
Според Благоја Менковски, командир на Противпожарната бригата, чии екипи се на терен, експлозијата се случила при сечење на старо железо, кое е расфрлано на локации и надвор од кругот на фабриката.