Скопје, 20 јули 2010 (МИА) -Директорот на Управата за спречување перење пари и финансирање тероризам Ване Цветанов денеска поднесе оставка од функцијата која ја извршуваше од 2006 година.
Тоа, како што наведува во оставката, не го прави поради Антикорупциска, туку поради „лицемерната политика и незаинтересираност за борба против вистинскиот криминал од страна на Владата“. Антикорупциска бараше разрешување на Цветанов поради констатирани пропусти во работата од страна на Државниот завод за ревизија.
Во оставката наведува дека на функцијата стапил со цел да се бори против вистинскиот криминал кој го гуши и стопанството и народот, но, како што вели, „веројатно застанав на многу патишта па ме снајде состојбава“.
Напоменувајќи за работењето во изминатиот четиригодишен период вели дека со излегувањето на резултатите на виделина, со обработката на случаите биле засегнати многу моќни структури, групи, и интереси и оти проблемите настанале во 2009 година кога до полицијата биле доставени купишта случаи. Тогаш, додава, наеднаш престанала и комуникацијата со Владата, а му забележува и на премиерот што не нашол време и покрај неговите барања за средба за да го информира за состојбите.