Скопје, 20 јули 2010 (МИА) – Се уште е неизвесно колку ќе трае денешната координација на претставници на пратеничките групи кај претседателот на Собранието Трајко Вељаноски.
Дискусијата околу измените на Деловникот почна пред речиси пет часа, но заглави зашто двете страни остануваат на своите ставови. Владејачкото мнозинство се уште смета дека е најоптимално опозицијата да предлага точка на дневен ред еднаш месечно, а опозицијата и натаму бара ова право да го користи на секоја нова пленарна седница.
Прашањето околу барањето на опозицијата за воспоставување парламентарен механизам за контрола на трошењето на буџетските пари, кое исто така денеска требаше да се разгледа, се уште не е отворено.
ВМРО-ДПМНЕ, како што информираат претставници на партијата, се обидува и има намера да ги затвори двете точки, формирањето на анкетната комисија и измените на собранискиот Деловник, во најкус можен рок, со цел до крајот на неделава да се стават на пленарна седница. Само во тој случај, напомнуваат, Собранието може да добие позитивна оценка од Брисел.
Доколку на координацијата не се постигне согласност, односно измените не се донесат, тогаш, според владејачкото мнозинство, опозицијата ќе докаже дека работи на добивање негативен извештај. Тоа, велат, ќе смени многу работи не само во Собранието, туку и на политички план.