Скопје, 21 октомври 2010 (МИА) - Евроамбасадорот Ерван Фуере изјави дека од македонските власти било побарано да преземат чекори за да се спречи злоупотреба на визната либерализација и манипулацијата со граѓаните од одредени нелегални или полулегални туристички оператори кои ги дезинформираат дека користејќи ја либерализацијата можат во европските земји и таму да останат.
- Во однос на индикациите за злоупотреба на процесот на визна либерализација апелиравме уште еднаш до властите, како што тоа го направивме уште на почетокот кога стартуваше визната либерализација, да изнајдат начини за справување со нелегалните или полулегалните туристички оператори кои што ги злоупотребуваат луѓето ветувајќи им дека ќе ги однесат во ветените дестинации, само со цел да им ги земат парите, изјави евроамбасадорот Ерван Фуере денеска на маргините на промоцијата на проектот „Натамошно зајакнување на институционалните капацитетите на Академијата за обука на судии и јавни обвинители“ финансиран од ЕУ.
Тој додава дека ова прашање доаѓа во непријатен момент со оглед на фактот што токму сега во ЕУ се разговара за проширување на самата визна либерализација со цел да опфаќа и други земји од Западен Балкан.
Сепак, Фуере вели дека прашањето на злоупотребата на визната либерализација го отвора и прашањето за условите во кои живеат луѓето овде, поради кои и се одлучуваат да заминат во европските земји.
- Ова прашање сепак не е ограничено само на прашањето за визна либерализација или патувањето надвор, туку отвора прашање и за условите во кои живеат луѓето овде, во однос на патната инфраструктура, во однос на работните места кои се отвораат и сметаме дека токму во овие сфери Владата треба да инвестира повеќе се со цел тие граѓани да не бидат привлечени да заминат од местата каде живеат, потенцираше евроамбасадорот Фуере.
Вчера и денеска во Македонија престојува белгискиот државен секретар за за буџет, азил и миграција и семејни работи Мелкиор Ватле, кој на македонските власти им ги пренесе истите поради - да не се злоупотребува визната либерализација, да се спречи новиот бран мигранти од Македонија во Белгија, а македонските граѓани да се информираат оти нема никакви шанси да добијат политички или економски азил.