Скопје, 23 ноември 2010 (МИА) - Заменик претседателот на Владата Абдилаќим Адеми и висок функционер во ДУИ, денеска негираше дека по сугестија на неговата партија е приведен Хисен Муслиу, поранешен функционер во Службата за државна безбедност во рамките на истрагата за досиејата поврзани со високи претставници на ДУИ, и упати одговори да се бараат од МВР и судските власти.
- Нашиот став од почеток беше дека државните институции треба да ја расчистат до крај оваа афера и затоа би ве упатил прашањата да ги упатите до Министерството за внатрешни работи и до македонското судство, изјави Адеми.
Тој демантираше дека претставници на ДУИ посочиле на Муслиу по што тој е приведен, како што објавија одредени медиуми.
- Тоа не е точно и токму затоа кажав дека треба да се обратите до МВР, рече вицепремиерот одговарајќи на новинарско прашање по средбата со евроамбасадорот Ерван Фуере во Владата на Република Македонија.
Фуере оцени дека прашањето за лустрацијата не треба да се политизира туку да се третира на многу сензитивен начин.
- Во сите држави досега се покажа како сензитивен процес и тоа не треба да биде дел од политичките агенди. Треба да им се дозволи на судските органи да си го направат своето, рече евроамбасадорот.