Охрид, 29 ноември 2010 (МИА) - При финансиската контрола на фирмите чие седиште е во објектот во кој се наоѓа и телевизијата А1, полицијата им асистираше на инспекциските служби, но не го попречи движењето на новинарите, изјави денеска во Охрид директорот на Бирото за јавна безбедност Љупчо Тодоровски.
Одговарајќи на новинарско прашање, Тодоровски посочи дека доказ за тоа е што телевизијата таа вечер емитувала програма од своето студио.
- Не попречувавме никого, знаете дека финансовата полиција заедно со УЈП влегоа во четири фирми што се водат на истата адреса каде што е А1, но никој немал намера, барем зборувам за полицијата, да ја попречува работата на А1, студиото си работеше и вие видовте дека тоа работеше, рече Тодоровски.
На прашањето дали полициските службеници и службените лица биле попречувани во работата и од кого, Тодоровски рече дека инспекциските служби треба да посочат кој ги спречувал службените лица во извршување на контролата.