Скопје, 10 декември 2010 (МИА) - Познатиот македонски пијанист Симон Трпчески вечер ќе настапи во „Метрополис арената“ во Скопје, заедно со Лондонскиот филхармониски оркестар, предводени од диригентот Владимир Јуровски.
На концертот ќе бидат изведени Симфонијата број 5 од Феликс Менделсон-Бартолди, Концерт за пијано и оркестар број 3 од Сергеј Прокофјев и Симфонија број 3 од Јоханес Брамс.
Организатор на концертот е Здружението за култура и уметност „КултурОп“, а покровител е Министерството за култура.
Со овој концерт Трпчески прославува два јубилеја - 15-годишнината од неговиот прв настап со оркестар, одржан во 1995 година со Македонската филхармонија во Скопје и 10-годишнината од неговиот прв настап со Лондонската филхармонија во финалето на натпреварот во Лондон, во 2000 година, на кој беше еден од победниците.
Лондонскиот филхармониски оркестар, со 78-годишна традиција, се смета за еден од најдобрите оркестри на меѓународна сцена и настапува пред публика низ целиот свет. Диригентот Владимир Јуровски е еден од најбараните млади диригенти на европската музичка сцена. Во 1999 година дебатира во Metropolitan Opera во Њујорк со „Риголето“, а во 2007 година станал главен диригент на Лондонскиот филхармониски оркестар.