Куманово, 10 јануари 2011 (МИА) - Околу 100 лица заболени од грип се евидентирани во Заводот за здравствена заштита во Куманово.
Од Одделот за епидемиологија информираат дека овој број е вообичаен за овој период од годината и нема простор за паника кај граѓаните.
- Оваа бројка можеби е поголема, но не сите случаи на инфекции на горните дишни патишта се регистрирани кај нас. Пријавени се од сите возрасти од деца до лица во поодминати години. Нема место за вознемирување кај граѓаните за разлика од минатата година кога покрај сезонскиот грип, владееше пандемијата на свинскиот грип, информира епидимиологот Предраг Георгиевски.
Инаку, Георгиевски ги советува граѓаните да се придржуваат кон упатствата на матичните лекари, а доколку сакаат се уште може да ја примат вакцината против сезонски груп.
- Вакцини има во доволни количини, не се од минатата година или со изминат рок, како што имаше информација на некои медиуми поради што и одзивот за вакцина оваа година беше послаб кај граѓаните. Се уште не доцна кој сака може да дојде и да ја прими вакцината, вели Георгиевски.
Вакцината против сезонски грип може да се прими секој ден на Одделот за епидемиологија и чини 400 денари.