Скопје, 9 август 2011 (МИА) - Градоначалникот на Гази Баба Тони Трајковски денеска соопшти дека општината ги одбила предложените измени на основниот проект за изградба на комплексот „Космос“.
Основна причина за одбивање на измените, нагласи, е тоа што има прекршувања на Законот за градење и измените поднесени кон крајот на јули годинава не се во согласност со Деталниот урбанистички план.
- Општина Гази Баба денеска донесе решение со кое се одбива како неосновано барањето на инвеститорот за измени и дополни на основниот проект во текот на градбата, поради констатирано големи неправилности, меѓу кои се - проектираната површина на градбата излегува од градежната линија, во приземјето има предвидено паркиралишта кои се изведени со доста поголема површина од предвидената во проектниот архитектонско – урбанистички проект и ДУП-от, рече Трајковски.
На место на мезанинот, како што рече, направено е паркиралиште кое по архитектонско - урбанистичкиот проект не постои.
- Сообраќајното решение е комплетно променето - пристапи и внатрешни сообраќајници во однос на одобрениот ДУП и одобрението за градење. Влезот во приземјето е со висина од 2,5 метри, што е пониско од проектираното во Основниот проект и спротивно на законските регулативи, рече Трајковски.
Тој информираше дека во моментов не се знае по кој проект се водел инвеститорот Фијат Цаноски при градбата.