Скопје, 12 септември 2011 (МИА) - Училиштата во Македонија во наредните три дена (13, 14 и 15 септември) ќе имаат настава со скратен временски период, согласно препораките на Комисијата за превенирање на последиците од топлотни бранови при Министерството за здравство. Се препорачува наставата да се одвива до 12 часот со што би се избегнале последиците од топлотниот бран.
Овие препораки денеска ги презентираа министрите за образование и наука и за здравство, Панче Кралев и Никола Тодоров.
- Во наредните три дена ќе има опасност за жолта тревога и затоа препорачуваме до Министерството за образование и наука да преземат мерки за различен режим на функционирање на училиштата. Има тенденција за зголемување на температурите. Пикот ќе биде во среда и четврток за кога се прогнозираат 37 степени во Скопје, истакна Тодоров.
Согласно препораките, рече министерот за образование и наука Панче Кралев, добивме насоки да се преземат мерки со кои ќе се заштити движењето на учениците и студентите до 12 часот.
- Тоа се исти мерки кои ги воведовме минатиот пат. Ќе продолжиме да ја следиме ситуацијата и доколку се утврди дека температурите не се намалуваат ќе бидат преземени дополнителни мерки или ќе се продолжат истите, посочи Кралев.
Директорите во соработка со родителите на учениците, истакна Кралев, треба да преземат соодветни мерки учениците да не се наоѓаат во училишната установа по 12 часот.
Одговарајќи на новинарско прашање, министерот Тодоров рече дека болничките установи ќе работат со несмален интензитет.