Скопје, 21 септември 2011 (МИА) - Здружението на новинарите на Македонија во пишана реакција го осуди однесувањето на европратеникот Јоргос Шацимакакис, кој вчера во Брисел на дебата за состојбата на медиумите во Македонија организирана во Европскиот парламент навреди македонски новинари со погрдни зборови и се огради од однесувањето на македонските претставници.
- Сметаме дека европратеникот Шацимаркакис треба да се однесува со почит кон македонските новинари како што се однесува кон секој европски новинар. Исто така, ЗНМ потенцира дека и македонските новинари треба да се однесуваат согласно етичките стандарди на Кодексот на новинарите, стои во реакцијата.
Наместо дебата за подобрувањето на состојбите, според Здружението, две групи новинари се обиделе да ја дисквалификуваат работата и активностите на ЗНМ, водени од како што се посочува, лични и други интереси спротивни на интересите на новинарите во Македонија и да претстави во јавноста погрешна слика.
Според ЗНМ, проблемите на медиумите и новинарите се решаваат во Македонија, а меѓународните институции можат да го помогнат процесот.
- Најдобар начин да се решат проблемите е да продолжи започнатиот дијалог меѓу ЗНМ и другите професионални здруженија со државните институции, се вели во реакцијата на Здружение на новинарите на Македонија.