Охрид, 27 септември 2011 (МИА) – Македонска државјанка го загубила животот во инцидент што во неделата вечерта се случил во градот Клирвотер во американската сојузна држава Флорида.
Зорана Лебедиќ (35), дипломиран фармацевт од Охрид била застрелана додека се возела на велосипед, на крстосницата меѓу улицата „Палмето“ и „Ферборн“ авенијата во Клирвотер.
Службата за итна медицинска помош при противпожарната единица на Клирвотер реагирале на повикот за помош, некаде околу 11 часот вечерта на 25 септември. Притоа застреланата Mакедонка итно била пренесена во Мортон плант болницата, каде само била констатирана нејзината смрт. Се уште не е познато дали Лебедиќ била цел на вооружен напад или се работи за несреќен случај односно за заскитан куршум, за што се чека официјалното полициско соопштение и резултатите од обдукцијата на телото на загинатата.
Зорана заедно со нејзиниот сопруг Климент Наумоски исто така по потекло од Охрид живееле во Скопје. Таа престојувала во Флорида како турист.