Скопје, 18 октомври 2011 (МИА) - Министерката за внатрешни работи Гордана Јанкулоска денеска информраше дека инцидентот што синоќа се случи во скопскиот хотел „Александар Палас“ е пријавен во МВР, веќе е практично расчистен и утврдени се причините за „спојот на инсталации“ предизвикан од неисправна светилка.
- Во моментот кога се случи настанот во хотелот не само што беше обезбедувањето на Емирот од Катар, шеик Хамад бин Калифа Ал Тани, туку и обезбедувањето на објектот, на личностите кои присуствуваа на вечерта. Ние веднаш направивме анализа дали станува збор за нешто што претставува безбедносна закана или проблем и практично беше утврдено дека се работи само со осветлувањето што не значи никаква закана ниту по безбедноста Емирот, ниту по безбедноста на гостите и на хотелот, изјави денеска министерката Јанкулоска, која присуствуваше на едукативно-превентивниот настан со средношколците до Средното медицинско училишта „ Панче Караѓозов“ по повод 18 - Октомври Европскиот ден за борба против трговија со луѓе.