Гевгелија, 10 јануари 2012 (МИА) - Од ски центарот „Кожуф“ досега се транспортирани 24 лица со специјални возила ратраци до месноста Смрдлива вода, каде поради отсеченоста на патиштата со снежни наноси и до пет метри, беа заглавени 60 туристи. Во текот на денот треба да се транспортираат уште 25 лица, а на Кожув до крајот на закупениот аранжман остануваат четири семејства, или вкупно 10 лица.
- Од вчера патот е пробиен со нашите три специјални возила ратраци, а расчистен со возила со плуг. Но засега тој е прооден само за специјално опремени возила, а непрооден за автомобили. Затоа на трошок на ски центарот „Кожуф“ на оние на кои им истече аранжманот им обезбедивме превоз до Смрдлива вода, и платен превоз до местото на живеење. Воедно, на наш трошок ќе им ги префрлиме нивните возила исто така до Смрдлива вода, вели извршниот директор на Ски центарот Ангел Наков.
Во населбата моментно престојуваат уште 45 лица, македонски гости од Скопје и Битола. На оние на кои им измина аранжманот за сместување Ски центарот им обезбеди бесплатен престој и храна.
- Во редовен контакт сме со единицата на АРМ која понуди хеликоптер, но немаше никакви здравствени итни проблеми за туристите на Кожуф, поради што се одложени таквите летови, изјави Наков.
На Кожув сеуште врне снег и нема услови за скијање. Во населбата има три метри снег, а на скијачката патека до четири метри. Сите возила на центарот и понатаму се на терен и продолжуваат со работа, за обезбедување проодност на делницата кон Смрдлива вода во должина од 15 километри.