Скопје, 9 април 2012 (МИА) - Несекојдневна појава се случи вчера на празникот Цветници во скопската црква Свети Великомаченик Димитрија. Фреските во внатрешноста на црквата, на кои со години се таложеше чадот од свеќите што ги палат верниците, почнаа самите се прочистуваат и да ја добиваат својата природна боја.
Прочистувањето почнало од фреската Воведение на пресвета Богородица на влезот црквата, а потоа и на фреските Вознесение Христово, Оплакување Христово, Св. Апостоли Петар и Павле, Свети Архангел Михаил и на другите фрески.
Природните бои најмногу се враќаат на ореолите над насликаните светци, а исто така и на дел од нивната одежда која е насликана со златната боја.
Црквата вчера ја посети поглаварот на МПЦ Архиепископот Охридски и Македонски г.г. Стефан, како и бројни верници кои сакаат да го видат чудото.
Ваков феномен, како што велат свештениците во Свети Димитрија, е забележан само во Русија во 30-те години од минатиот век, кога во една црква почнале да се враќаат природните бои на фреските и иконите.