Скопје, 17 април 2012 (МИА) - Претседателот на Здружението на новинарите на Македонија Насер Селмани ги повика новинарите одговорно и професионално да известуваат во врска со петкратното убиство кај скопско Смиљковци.
- Апелирам до новинарите да не изнесуваат непотврдени информации во јавноста и да не шпекулираат за евентуалните извршители и мотивите на ова злосторство. Сметам дека медиумите не смеат да ја злоупотребат болката и огромната загуба на семејствата на убиените сограѓани за да поттикнуваат етничко насилство. Тие што ги убија петтемина скопјани имаат само едно име - ладнокрвни убијци, на кои треба да им суди правната држава, истакнува Селмани во писмената изјава.
Македонските граѓани, нагласува тој, се обединети во осудата на ова грозоморно убиство, бидејќи се свесни дека убијците не пукаа само врз невини луѓе, туку пукаа и врз мирот и иднината на Македонија.