Скопје, 3 мај 2012 (МИА) - Истражен судија им одреди 30-дневен притвор на петтмина осомничени за тероризам поради петкратното убиство кај Смиљковското Езеро на 12 април годинава, потврдија за МИА во канцеларијата за односи со јавност на Основниот суд Скопје 1.
Тројца од осомничените се пренесени во затвор, а двајца се во бегство и притворот ќе им почне кога ќе бидат приведени.
Притвор од 30 дена им е одреден на уште четири лица осомничени за неовластено производство, држење и тргување со оружје или распрскувачки материи
На шеесетгодишната жена од липковското село Отља, кај која полиција пронајде поголемо количество оружје и муниција, и се одредени превентивни мерки - одземена и е патната исправа и има обврска се јавува во суд.
На 10 приведени во полициската акција „Монструм“, по барање на МВР, им е одреден краткотраен притвор од 48 часа.
Државниот јавен обвинител Љупчо Шврговски вчера најави дека Обвинителството ќе бара максимална казна за сторителите на петкратното убиство кај Смиљковското Езеро.
- Законот е многу ригорозен. Се работи за најтежок вид кривични дела-тероризам, за кои е предвидена максимална казна доживотен затвор. Се надевам дека полицијата врз основа на биолошките и материјалните докази што ги има прибрано ќе срочи квалитетна кривична пријава која ќе може да ја процесуираме во најкраток можен рок, изјави Шврговски.