Одбележан 20 Мај - Денот на пожарникарите

Скопје, 21 мај 2012 (МИА) - Дирекцијата за заштита и спасување и Противпожарниот сојуз на Македонија денеска го одбележаа 20 Мај - Денот на пожарникарите.

- Противпожарниот сојуз на Македонија и годинава, како и претходните, веќе традиционално го одбележува овој ден и покренува кампања за заштита на шумите од пожари. Во овој момент, во сите градови во Република Македонија одат вакви или слични кампањи, проследени со соодветен пропаганден материјал, на кој се истакнува значењето на шумата како еко систем, со својот биодиверзитет, но и потребата на луѓето да се заземат сето тоа што шумата во себе го има да се заштити, изјави претседателот на Противпожарниот сојуз на Македонија, Никола Николов.

Тој рече дека изминатите 12 години, според статистиката, Македонија од шумски пожари годишно има штети од 4 до 5 милиони евра.

- Тука влегуваат не само штети за гасење, изгорена површина, туку и за обнова на она што е веќе изгорено. Ова е мотив повеќе за сите нас, заедно и со Дирекцијата за заштита и спасување, со професионалните единици, со шумарството, да се заземеме за заштита на нашите шуми од пожари, рече Николов.

Тодор Грков, раководител на Сектор за планирање и развој во Дирекцијата за заштита и спасување истакна дека со одредени финансиски средства го поддржуваат Противпожарниот сојуз на Македонија со цел да ги реализира своите цели и задачи, особено во спроведување на противпожарната превентива, вклучувајќи ги подготовките на доброволните пожарникари за учество во гаснењето на пожарите, пред се на отворен простор и во едукацијата на населението за постапките кои задолжително требе да ги применуваат при кампување во шумите.