Скопје, 22 мај 2012 (МИА) - Срамно е што Македонија не доби покана на Самитот во Чикаго. Постојаната блокада на македонското членство во НАТО е неоправдана, оценува поранешниот генерален секретар на Алијансата Џорџ Робертсон во изјава за емисијата „Порта“ на МТВ.
- Македонија ги исполни сите критериуми за членство и игра непропорционална улога во мировните трупи на НАТО операциите. Самото тоа значи членство. Во 2001-ва Македонија се соочи со реален предизвик за Европа, но и за светот. Со свои сили обезбеди да се надмине еден конфликт со договор што е пример за многу генерации, вели Робертсон.
Тој ги критикува членките на НАТО што не најдоа начин како да ја внесат Македонија во Алијансата, затоа што според него земјата не може сама да го реши спорот со Грција.
- Дополнителен напор треба да вложаат сите за да се надминат сите пречки за македонското членство. Спротивно, основачките принципи на Алијансата ќе бидат предадени, истакнува поранешниот секретар на НАТО Џорџ Робертсон.