Фотографија снимена од безбедносни камери на коja се гледа лице кое можеби пред два дена го изврши нападот врз новинарот Дејан Давидовски во неговиот стан, се појави на социјалните мрежи на Интернет. Од полицијата засега немаат никакви информации, ниту пак потврда дали ова е лицето кое го извршило нападот.
Снимката е направена вечерта кога се случил инцидентот, на само неколку минути пред нападот врз Давидовски.
Дејан Давидовски, поранешен новинар и презентер во Македонската радиотелевизија беше избоден со нож во неговиот стан во скопската населба Капиштец во неделата.
Од Ургентниот центар каде тој бил веднаш пренесен по нападот, вчера за Нетпрес изјавија дека неговата состојба се подобрува и дека од интензивна нега, Давидовски е префрлен во соба каде закрепнува од операцијата.