Активисти на Граѓанското Движење „Разбуди се!“ со пораки ќе ги пречекаат пратениците пред денешната дебата за Законот за Бранителите.
Собраниската Комисија за труд и социјална политика на денешната седница ќе ја продолжи расправата по Предлог - законот за бранителите.
Законот до Собранието го достави пратеничката група на ВМРО-ДПМНЕ и негова цел е регулирање на посебните и социјални права, кои согласно член 36 од Уставот им се загарантирани на припадниците кои учествуваа во одбраната на суверенитетот на Република Македонија.
Поддршка за законот даде и опозицискиот СДСМ, додека партиите на Албанците во Парламентот беа против, со образложение дека тој е антиалбански, дискриминаторски, како и дека е штетен за мултиетничкиот живот и евроатлантската иднина на Македонија. Од ДУИ најавија дека ќе ги искористат сите административни, процедурални и технички средства што им стојат на располагање за да го спречат донесувањето на законот.