Скопје, 28 септември 2012 (МИА) - Кај уште едно лице лабораториски е потврдено присуство на западнонилска треска, соопшти Министерството за здравство.
Станува збор за дете на едногодишна возраст, хоспитализирано на Клиниката за детски болести, со треска и покачена температура, со полесна форма на болеста, без тешки компликации, како менингит и енцефалит.
Според податоците од Институтот за јавно здравје на Македонија, од пет лабораториски анализи, доставени од Клиниката за детски болести, една (на детето) била позитивна, а четири негативни.
На Клиниката за инфективни болести се уште се лекува двеиполгодишното дете, кое и натаму е во потешка здравствена состојба, додека останатите две лица (7-годишно дете и повозрасен маж) по успешното лекување се пуштени дома.
Во Македонија досега се евидентирани шестмина заболени од западнонилска треска, од кои двајца починаа.