Меѓународна конференција за националните институции за човекови права

Скопје, 3 октомври 2012 (МИА) - Препораки за применети политики базирани на докази во креирањето модел за национална институција за човекови права во Македонија во согласност со меѓународните стандарди и најдобри практики, со цел добивање акредитација со „А“ статус. Тоа треба да понуди дискусијата од меѓународната конференција   „Националните институции за човекови права и промоција и заштита на човековите права во Македонија и Западен Балкан“, што се одржува од денеска во Скопје.

Учесниците на конференцијата - народни правобранители, претставници на комисии и иницијативи за човекови права, експерти... , дискутираат за состојбите и предизвиците поврзани со човековите права и институционалните модели на националните институции, со фокус на најефективниот модел за  таква институција во Македонија и во регионот, со следење на Париските принципи.

Според насоките од студиите на  Центарот за регионални истражувања и соработка, органзиатор на конференцијата, во Македонија постојат многу можности за подобрување на националните институции за човекови права во однос на постоечките меѓународни стандарди. Многу од проблемите со кои се соочуваат двете национални институции за човекови права во Македонија, Народниот правобранител и Комисијата за заштита од дискриминација, според нивната моментна поставеност се слични (промоција, образование и подигање на свест, плуралност и услови за избор, средства...).

- За стратешки пристап кон проблемите потребно е да се отвори процес на широка јавна консултација за реформирање на системот за човекови права и да биде поддржан со силна политичка волја и значајни гаранции за одржување на процесот.