Брисел, 18 февруари 2013 (МИА) - Европскиот парламент не поддржува бојкот на избори, реагира известувачот за Република Македонија Ричард Ховит, по сознанието дека дел од опозициската СДСМ и дел од нивната коалиција не доставиле листа на кандидати за претстојните локални избори.
Во изјава за МИА, британскиот европратеник вели дека сите политички актери во Македонија треба да најдат решение што би било во интерес на државата.
- Како што јасно им кажав на сите политички лидери во вашата земја при мојата посета минатата недела, Европскиот парламент не поддржува бојкот на избори. Сите политички партии имаат одговорност да најдат решение што е во поголем интерес за земјата како целина, изјави Ховит за МИА.