Македонска културна недела во францускиот град ЕпиналЕпинал, 15 април 2013 (МИА) - Во францускиот град Епинал (Источна Франција) денеска почнува „Македонската културна недела“, која се одржува од 15 до 21 овој месец во Домот на младите и културата Сант-Лоран, јавува дописникот на МИА од Стразбур.
Манифестацијата ќе биде отворена вечерва со изложба фотографии посветена на Македонија, во присуство на Петар Поп-Арсов, амбасадор на Република Македонија при Постојаната мисија на Република Македонија во Советот на Европа во Стразбур.
„Македонската културна недела“ се одржува во рамки на годинашната манифестација „Европска недела“ која вообичаено е посветена на земји членки на Европската унија. Во Епинал, кој е збратимен град со Битола од 1968 година одлучија оваа недела да и биде посветена на Македонија.
Во рамките на манифестацијата предвидено е претставување на културно-историското наследство на Македонија, јазикот, музиката, филмот, фолклорот и македонската гастрономија.
Реализацијата на манифестација ја поддржаа Постојаната мисија на Република Македонија при Советот на Европа, Општина Битола, Филмскиот фонд на Македонија, Агенцијата за туризам на Република Македонија и општината на градот Епинал. Во реализиацијата се вклучи и малиот број македонци кои живеат во Епинал и неговите соседни градови, кои се конкретни носители на бројните активности кои ќе им дозволат на жителите на Епинал да се запознаат повеќе со Македонија.
|