Бранко Црвенковски сепак ќе биде кандидиран за претседател на СДСМ - иницијативниот одбор за останување на сеуште актуелниот лидер на чело на СДСМ, вечерва и официјално на Бихаќка ќе ја предаде кандидатурата - ова за Канал 5 го потврдил претседателот на одборот, Наум Буревски.
Тој очекува дека бројот на собрани потписи за кандидатура на Црвенковски ќе биде над 20 илјади.
Од друга страна, извори од СДСМ во јавноста пренесоа дека Црвенковски и на последната седница на Извршниот одбор на партијата го повторил ставот дека нема намера да биде кандидат за претседател и оти ќе се држи настрана од кампањата.
Извршниот одбор на СДСМ утре ќе одлучува за поднесените кандидатури, а засега интерес за учество во трката за нов лидер пројавија Зоран Јовановски, Игор Ивановски, Кире Наумов и Зоран Заев, чии кандидатури Одборот ќе ги разгледа заедно со предлозите на општинските партиски организации.
Од 17 до 27 мај ќе трае внатрепартиската кампања за избор на нов претседател на СДСМ - време во кое кандидатите ќе треба своите програми да ги претстават пред општинските организации.