Скопје, 14 јуни 2013 (МИА) - Владиката Полошко-кумановски Кирил денеска беше погребан во манастирот „Свети Ѓорѓи“ во Дељадровци во општина Илинден.
Претходно во Соборниот храм „Свети Климент Охридски“ во Скопје во присуство на највисокото свешетенство на МПЦ, на државниот врв и голем број граѓани, беше отслужено опело за упокоениот владика.
Во негова чест МПЦ и општина Илинден денешниот ден го прогласија за ден на жалост.
Митрополитот Полошко - кумановски господин Кирил почина по кратко боледување на 11 јуни на 79-годишна возраст.
Манастирот „Свети Ѓорѓија“ во Дељадровци, кој ќе биде вечното почивалиште на митрополитот Кирил е изграден 1921 година, а во негов состав се наоѓаат црквите „Св.Ѓорѓија“, „Св.Петка“, „Св.Недела“, „Св.Архангел“, „Михаил и Гаврил“, „Св.Злата Мегленска“ и „Св.Мала Богородица“. Овој манастирски комплекс претставува црковна лавра единствена во Полошко-кумановската епархија.