Скопје, 12 септември 2013 (МИА) - Претседателот Ѓорѓе Иванов вели дека по последните средби на медијаторот за прашањето за името Метју Нимиц со македонската и со грчката страна се уште нема решение за прашањето за името и приближување на ставовите.
- Има согласност за името Македонија да биде содржано во решението, но приближување на ставите се уште нема. Тоа што го кажа Нимиц тоа е реалноста и ние очекуваме грчката страна да се држи до рамката во која се водат преговорите бидејќи постои дефинирана рамка од Обединетите нации, изјави денеска Иванов.
Според него, другата страна секојпат настапува ултимативно и настојува само нејзините барања да бидат задоволени, а не барањата и потребите на другата страна.
- Станува збор за заемно прифатливо решение. Затоа очекуваме дека грчката страна конечно ќе се придржува до рамката која е предвидена. Некојпат и времето носи решение, а реалноста е таква каква што е што ја пренесе Нимиц, рече претседателот Иванов.
На новинарско прашање дали е точно дека е прифатено во решението да има географска одредница и оти проблем е каде да се наоѓа, Иванов одговори дека состојбата е дека нема решение.
- Тие се детали. Станува збор за предлог, предлогот има многу нијанси. Господинот Нимиц треба и од нашата страна, нашиот став, нашата позиција и од грчката да дојде до заемно прифатливо решение. Се се тоа шпекулации, фактички сега состојбата е дека нема решение, изјави Иванов по пуштањето во употреба на нов парк во општина Аеродром.