Во Делчево манифестација „Пијанечки денови на сливата“ Делчево, 20 септември 2013 (МИА) - Со цел промоција на сливата и производите од слива како земјоделски производ карактеристичен за Делчево и регионот Пијанец, општина Делчево во соработка со локалните институции почнувајќи од годинава ја организира манифестацијата „Пијанечки денови на сливата 2013“.
Во рамки на оваа повеќедневна манифестација предвидени се поголем број културни настани и активности преку кои е овозможена промоција на речиси сите производи чие што производство е базирано на сливата, како и промоција на правните и физичките субјекти од Делчево и регионот кои на било кој начин учествуваат во култивирањето на сливата и производите од слива.
Градоначалникот Дарко Шехтански денеска симболично ја започна оваа манифестација со берење сливи од најдобро култивираниот насад на слива за оваа година, како и залевање на коренот на сливите со најубавата минатогодишна домашна ракија подготвена токму од овој сливов насад.
Како дел од програмата за оваа манифестација денеска попладне предвидено е да се одржи Првата меѓународната вечер на хумор и сатира „Пијанец 2013“ и Меѓународна изложба на карикатура на тема „Внимавај слива“. Исто така, ќе бидат доделени и наградите од Меѓународниот конкурс за доделување на награди за афоризам и карикатура на истата тема, за кој имаше пријавено учесници од цел свет.
Утре ќе се одржи централниот настан во чиишто рамки ќе има натпревар во печење на ракија, при што ќе бидат подготвувани и повеќе домашни специјалитети врз база на слива.
Посетителите на овој настан ќе може да дегустираат од подготвените специјалитети. Настанот ќе биде збогатен со богата културно-уметничка програма на летната сцена во центарот на градот по што ќе бидат доделени наградите за највесела ракија и најгрижливо одгледан насад.
|